سندريلا في بغداد قصة واقعيه على ساحة عراقية

كان ياما كان
في عتيك الزمان
(من جان الرسيفر ب 5 دنانير ونص و من جان البعير همر و من جان الصمون
ينباع فل )
جان اكو حاتة اسمها سندرلا خوش حاتة اصيلة و علمودها غنة حسام الاغنية
مال العكربة,,,المهم جان عدها مرت اب كلش خبيثة و جانت تشتغل وية الامريكان مترجمة
و ابوها جان خطية يبيع قوايش مبردات حجم 1100 اب عكد النصارى و احيانا يبيع شخاط
فلّ خوش ازلمة جان مال اول ... و جانو الكل سايكين على سندرلا خطية روحي سوي الجوزة
مال مولد فصلت ,,,روحي اوكفي سرة عال غاز,,, روحي اشتري شحاطات ال خواتج (اللي همة
جانو 3 خوات بس من غير اب هم خبيثات للهامة ),,,روحي شلعي الشتايكر مال السطح و
رجعية مرة لخ,,,روحي جيبي لفات فلافل مشي,,روحي اشتري مخضر من سيد الحليب ..روحي
بدلي الدهن مال المولدة الاقصى كامت أتفحّط ...و هاي خطية جانت كلش حبااابة و تروح
ولا تفتح حلكها (بس من جواها جان التقسيم مشتغل) المهم,,,,,الى أن يوم من الايام
جانت دا اصعد مي اب جليكان ابو ال 20 (المي ضعيف و الماطور ما ايصعد لان
ماكوكهرباء) لكت بالطرمة فانوس بس شنوو مزنجر و عتيك عبالك جان ابدوائر الدولة و
اتحوسم جتي علية فركتة و جرررب كام يطلع دخان سندرلللا انرعصت و ازبهّلت و رجعت
خطوتين للخلف بسبب المفاجأة حتة اصطدمت بالدنكة(مع انه ما جان اكو
دنكة)
و
كالت :هاي شنو العالم حتة هنا ايحركون زبل و
تايرات؟؟؟
شنو هال دخان هذا؟الدخان شوية شوية اتحول الى جني لابس دريس مال ريال
مدريد و بوتين اديداس وسوار ذهب و حاط معطر freedom for men و كللها:-

-شبيك
لبيك عبدك بين ايديك انا الجني ( مخبوص المخبص ) من العرصات شتريدين اسويلج بس عال
سريع لأان ماما دكتلي مسكول لازم ارجع
-عمو جني اريد وطني 24 ساعة ممكن؟

-ولج
بابة هوة اني ساحب واير 5 امبير من مولد للفانوس اشون اجيبلج الج وطني 24 ساعة؟ شنو
جني لو وزير الكهرباء؟
-زين عمو عمو اريد قنينة مال غاز متروسة لأن امعوزين و
كلش .....
-ولج عمو شنو هال حجي؟ ولج انتي شكد فكرية.. اكو واحد يطلب من جني
قنينة مال غاز؟ شايفتني رابط الفانوس عال حصان؟
-عمو عمو لعد اشتكدر اتسويلي؟

-باعي
عمو انتي بعدج اصغيرة و محرومة و الامير راح ايسوي حفلة و ادري عائلتج راح اتروح
شنو رايج لو اخليج اتروحين و تتونسين؟ احتمال اتطلعين اب صاية و صرماية لأن الشرقية
هم دا اتصور هناك حفلة طاكة بابة.
- زين اشون اروح عمو؟نفرات لو كيا؟

-بابة
معليج هسة غمضي عينج.... سندرلا غمضت عينها
(و من الغريب يا جماعة انه اول ما غمضت
عينها ما كامت اتشوف و هذا الشي محد لكالة تفسير لي
هسة)
و
جررررب شافت سندرللا نفسها لابسة تنورة كصيرة و بدي و حذاء مفتوح يعني طلعت حااتة
اللا مش ممكن
و كللها الحلفة اقصد الحفلة تخلص بال 8 و نص علمود منع التجول و كل
هاي الهدوم راح توكع و الحذاء و الميك اب و كلشي راح يختفي اذا عبرت ال 8 و نص و
احتمال تنلعسين بالطريق
-حاضر عمو شكرااااااااااااااااااااااا(هاي شكرا الطويلة
مال الزعاطيط)
وصلت سندرللا البيت الامير جان امسوي حفلة لان طلع 77 بالسادس حيروح
جامعة اهلية احتمال او طب بيطري بعد ما اعرف و الحفلة جان بيها نجود و سمراء و
ساجدة عبيد(كلة هجع و عالكة) و سهام السبتي هم جانت موجودة و الامير شاد الرباط علة
راسة و امقندل و صاير طلي و ردح لليافوخ و فجأة الامير صاد سندرللا و عجبتة و
كابلها جتف ساعتين و ساندرللا نست روحها و نست الكراب و السراوات و البهذلة و نزلت
ردح الى ان صارت 8 و نص ......اللهّّّّ!!!!! انلاصت اتذكرت الوصية مال ( مخبوص
المخبص ) الجني و كالت لازم اشطح و ركضتلك عال سريع جنها برزلة هس توها امجفتة و
الامير وراها:
-وج تعاااي شبيج اتخبلتي؟مو دا احاجيج ؟؟؟ وين امولية ؟؟؟ فضيلة(هلكد
ما سكران نسة اسمها)المهم ركضت سندرللا و جررب وكع الحذاء مالتها بلا ما تدري جان
الامير ايشيل الحذاء و لزمة و ضل صافن عال عالم اللي انتبهو عال لقطة و كامو
ايباوعون علية الامير بقة شايل الحذاء و
مصدوم و صورة سندرللا الحلوة اببالة,,,
الحفلة اتوقفت طبعا و العالم سكتت من المفاجأة والموسيقى وكفت , وبطلو الناس من
الزقنبوت
جان ايباوع الامير عال العالم ....صنطة.......و كال للناس :

الشركة
العامة للصناعات الجلدية: فخر الصناعة الوطنية العراقية خبرة و تميز في مجال
المصنوعات الجلدية من الأحذية و الحقائب بأرقى المواد الاولية الفرع الرئيسي
:الكرادة قرب جسر ابو الطابقين..
ياجماعة هاي الجم سطر الاخيرة جذب ماكو بس شسويلة للجني
( مخبوص المخبص ) بعد حجاها .والباقي كله صحيح
بصحيح

منقوووووووووووووول

هههههههههههههههههههههههههههههههههههههههه

شنو هالتحشيش .. يسلموووو خيووووو

» دارميات عراقية جميلة
» بغداد... عذرا ..
» نكت عراقية الي كول قديمة اضربة طلقة ههههههههههههههههه
» رسائل عراقية جديدة\\طاكة
» رساله الى حبيبتي بغداد